jump to navigation

ನೋ ಜೋಕ್ಸ್ ಪ್ಲೀಸ್! December 20, 2008

Posted by uniquesupri in Uncategorized.
Tags: , , , , , ,
trackback

-ನಗೆ ಸಾಮ್ರಾಟ್


rajneesh_chandra_mohan_portrait

ಓಶೋ ಎಂಬ ಜಗತ್ತಿನ ಅತ್ಯಂತ funny ಮನುಷ್ಯನ ಬಗ್ಗೆ ನಾವು ತುಂಬಾ ಸೀರಿಯಸ್ಸಾಗಿ ಯೋಚಿಸ್ತಿದ್ದೀವಿ ಅಂತ ನಾನೂ ತುಂಬಾ ಸಲ ಸೀರಿಯಸ್ಸಾಗಿ ಆಲೋಚಿಸಿದ್ದಿದೆ! ಸಹಜವಾಗಿ ತೇಲಿಬಂದ ಗಾಳಿಗೆ ತೊನೆಯುವ ಗಿಡದ ರೆಂಬೆಯನ್ನು ಕಂಡು ಪುಟ್ಟ ಮಗು ಕೈತಟ್ಟಿ ಸಂಭ್ರಮಿಸಿ ಕುಣಿಯುವುದನ್ನೂ ನಾವು ಜಗತ್ತಿನ ನಿಗೂಢಗಳಲ್ಲಿ ಒಂದು ಎಂದು ಭಾವಿಸುತ್ತೇವೆ. ಮಗುವಿನ ಮುಗ್ಧ ಸಂಭ್ರಮದ ಬಗ್ಗೆ ಪಾಂಡಿತ್ಯಪೂರ್ಣವಾದ ಪ್ರಬಂಧ ಬರೆದು ಎಂಥಾ ವಿಸ್ಮಯ ಅಂತ ಕೃತಕ ಅಚ್ಚರಿಯನ್ನು ನಟಿಸುವಾಗ ನಮಗೆ ನಾವು ಪಂಡಿತರಾಗುವ ಹಾದಿಯಲ್ಲಿ ಬಿಟ್ಟುಬಂದದ್ದು ಅದೇ ಮುಗ್ಧತೆಯನ್ನು ಎಂದು ಹೊಳೆಯುವುದಿಲ್ಲ. ಅದೇ ಗಾಳಿಗೆ, ಅದೇ ಗಿಡದ ಕೊಂಬೆ ತೊನೆಯುವುದನ್ನು ಕಂಡು ನಾವೂ ಕೇಕೆ ಹಾಕಿಕೊಂಡು ನಗಬಹುದು ಹಾಗೂ ರೀತಿ ನಗುವುದರಲ್ಲೇ ಜೀವ ಕಳೆ ಇರುವುದು ಎಂಬುದು ನಮಗೆ ತಿಳಿಯುವುದಿಲ್ಲ. ಅಬೋಧ ಮಗುವನ್ನು ಬಹುದೊಡ್ಡ ಗುರುವಾಗಿ ನಾವು ಕಂಡು ಬೆರಗಾಗುತ್ತೇವೆ!


ಯಾವ ಧರ್ಮ ಗುರುವಿನ ಉಪದೇಶದಲ್ಲಾದರೂ ನೀವು ಜೋಕುಗಳನ್ನು ಕೇಳಿದ್ದೀರಾ? ಯಾವುದೇ ದೇಶದ ತತ್ವಜ್ಞಾನಿಯೊಬ್ಬ ಎಲ್ಲರೊಡನೆ ಕುಣಿಯುತ್ತಾ, ಹಿನ್ನೆಲೆಯಲ್ಲಿ ಕೇಳುವ ವಾದ್ಯದ ತಾಳಕ್ಕೆ ಹೆಜ್ಜೆ ಹಾಕುತ್ತಾ ಅದನ್ನೇ ಧ್ಯಾನ ಎಂದದ್ದನ್ನು ನೋಡಿದ್ದೀರಾ? ‘ನಾನು ಹಾಸ್ಯಾಸ್ಪದವಾಗಿರಲಿಕ್ಕೆ ಸರ್ವ ರೀತಿಯಲ್ಲೂ ಸ್ವತಂತ್ರನು’ ಎಂದು ಘೋಷಿಸಿಕೊಂಡ ಗುರು’ವಿನ ಬಗ್ಗೆ ಎಲ್ಲಾದರೂ ಕೇಳಿದ್ದೀರಾ? ಯೇಸು ಕ್ರಿಸ್ತ ಹೇಳಿದ ಕಥೆಗಳನ್ನು ನೆನಪು ಮಾಡಿಕೊಳ್ಳಿ, ಬುದ್ಧನ ಉಪದೇಶಗಳನ್ನು ತಿರುವಿ ಹಾಕಿ, ಮೊಹಮ್ಮದ್ ಪೈಗಂಬರ್ ಹೇಳಿದ ದೇವರ ಆದೇಶ’ಗಳನ್ನು ಕಿವಿಗೊಟ್ಟು ಕೇಳಿ, ವಿವೇಕಾನಂದರ ವೀರ ವಾಣಿಗೆ ಕಿವಿಯಾಗಿ ಅಲ್ಲೆಲ್ಲಾದರೂ ನಿಮಗೆ ಒಂದೇ ಒಂದು ಪೋಲಿ ಜೋಕು ಕಣ್ಣಿಗೆ ಬೀಳುತ್ತದಾ? ಇಲ್ಲ. ಅದಕ್ಕೇ ಓಶೋ ಎಲ್ಲರಿಗಿಂತ ಭಿನ್ನನಾಗಿ ಕಾಣುವುದು. ಆದರೆ ಭಿನ್ನತೆಯಷ್ಟೇ ಆತನ ಸ್ವಂತಿಕೆಯಲ್ಲ ಅನ್ನೋದನ್ನ ಸ್ವಲ್ಪ ಸಮಯದಲ್ಲಿ ನಿಮಗೆ ಗೋಚರಿಸುವಂತೆ ಮಾಡುತ್ತಾನೆ ಆತ.


ಪುಟ್ಟ ಟಿಪ್ಪಣಿಯನ್ನು ಮುಗಿಸುವುದಕ್ಕೆ ಮುನ್ನ ಇತ್ತೀಚೆಗಷ್ಟೇ ಓದಿದ ಓಶೋನ ಉಪನ್ಯಾಸದಲ್ಲಿನ ಜೋಕನ್ನು ನೆನಪು ಮಾಡಿಕೊಳ್ಳಬಯಸುತ್ತೇನೆ. ಅವಳೊಬ್ಬ ಅಮೇರಿಕನ್ ಮಹಿಳೆ. ಹೊಸತಾಗಿ ಕ್ಯಾಥೋಲಿಕ್ ಧರ್ಮಕ್ಕೆ ಮತಾಂತರ ಗೊಂಡಿದ್ದಳು. ಹೊಸತಾಗಿ ಮತಾಂತರ ಗೊಂಡ ಕ್ರೈಸ್ತರ ಹುಮ್ಮಸ್ಸು ಬಹುದೊಡ್ಡದಿರುತ್ತದೆ.


ಸರಿ ಒಮ್ಮೆ ನಗರದ ಪ್ರಖ್ಯಾತ ಚರ್ಚಿಗೆ ಕ್ರೈಸ್ತ ಧರ್ಮ ಗುರು ಪೋಪ್ ಭೇಟಿಕೊಡುತ್ತಾರೆ. ಮಹಿಳೆಯ ಹುಮ್ಮಸ್ಸು ಹಾಗೂ ಆಕೆ ಧರ್ಮ ಪ್ರಚಾರದಲ್ಲಿ ತೊಡಗಿಕೊಂಡ ರೀತಿಯನ್ನು ಕೇಳಿ ತಿಳಿದು ಪೋಪ್‌ಗೆ ಅತೀವ ಸಂತೋಷವಾಗುತ್ತದೆ. ಆತನೊಂದಿಗೆ ಮಾತನಾಡಬಯಸಿದ ಆಕೆಗೆ ಅನುಮತಿಯನ್ನೂ ಕೊಡುತ್ತಾನೆ. ಮಹಿಳೆ ಪೋಪ್ ಬಳಿ ಮಾತಿಗೆ ನಿಲ್ಲುತ್ತಾಳೆ. ಅವರ ಕೋಣೆಯ ಹೊರಗೆ ನಿಂತಿದ್ದ ಭದ್ರತಾ ಸಿಬ್ಬಂದಿಗೆ ಪೋಪ್ ಆಕೆಯೊಂದಿಗೆ ಯಾವುದೋ ಗಾಢ ಚರ್ಚೆಯಲ್ಲಿ ಮಗ್ನನಾಗಿರುವಂತೆ ಕಾಣುತ್ತದೆ. ಇದನ್ನು ಕಂಡ ಪತ್ರಕರ್ತನೊಬ್ಬನಿಗೆ ಆಶ್ಚರ್ಯವಾಗುತ್ತದೆ. ಪೋಪ್ ಇಷ್ಟು ಹೊತ್ತು ಯಾರೊಂದಿಗೆ ಚರ್ಚೆ ನಡೆಸುತ್ತಿರಬಹುದು? ಏನೆಂದು ಮಾತುಕತೆ ನಡೆಯುತ್ತಿರಬಹುದು ಎಂದು ಆತ ಕುತೂಹಲಗೊಳ್ಳುತ್ತಾನೆ. ಹೆಣ್ಣಿನೊಂದಿಗೆ ಪೋಪ್ ಚರ್ಚಿಸುತ್ತಿರುವ ವಿಷಯವನ್ನು ತಿಳಿದುಕೊಳ್ಳಬೇಕೆಂಬ ಕುತೂಹಲದಿಂದ ಆತ ಕೋಣೆಯ ಬಳಿಗೆ ಬರುತ್ತಾನೆ. ಪೋಪ್ ದೀನ ಸ್ವರದಲ್ಲಿ ಹೆಣ್ಣಿಗೆ ಹೇಳುತ್ತಿರುತ್ತಾನೆ, ‘ತಾಯಿ ನನ್ನನ್ನು ಬಿಟ್ಟು ಬಿಡು ನಾನು ಈಗಾಗಲೇ ಕ್ಯಾಥೋಲಿಕ್ ಆಗಿದ್ದೇನೆ.’


ಇಲ್ಲಿರುವ ಒಂದು ಧರ್ಮ ಹಾಗೂ ಧಾರ್ಮಿಕ ಸಂಗತಿಗಳ ಉಲ್ಲೇಖ ಕೇವಲ ಸಾಂಕೇತಿಕ. ಯಾವ ಧರ್ಮಕ್ಕಾದರೂ ಇದು ಅನ್ವಯವಾಗುತ್ತದೆ. ಇದನ್ನು ವೈಯಕ್ತಿಕವಾಗಿ ತೆಗೆದುಕೊಂಡು ಗಂಭೀರವಾಗುವವರೇ ಜಗತ್ತಿನಲ್ಲಿ ಹೆಚ್ಚು. ಜೋಕನ್ನೂ ಗಂಭೀರವಾಗಿ ಪರಿಗಣಿಸುವುದು ಅವರ ಕರ್ಮ!

Comments»

No comments yet — be the first.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: